Rev 7 | MBH | STEP | Na ur areken i vus, lama tho thopol ensel or penel ako o mit a ulue ongepo epipeere nge, na o krim tuntun thue le espotonga or penel aken mo thue i pavurvur avele ako aro i thu ulue na rua na won.

Revelation of John 7

Toko or 144,000 ako or ini Judare o el a God ile paatealing.

1 Na ur areken i vus, lama tho thopol ensel or penel ako o mit a ulue ongepo epipeere nge, na o krim tuntun thue le espotonga or penel aken mo thue i pavurvur avele ako aro i thu ulue na rua na won. 2 Lama tho thopola ensel relnga e ako i velpol a nang theki ile velpolainga na i es me, na i krim a God ako i mimi evelelnga ile ur ako i oma paatealing nge. Na i presa viringa nge ensel or penel ako God i sungu engenging a or nge ve aro o pakerenga ulue ome rua. 3 Na i ria ve, “O mothong tova o pakerenga ulue na rua na won i pavurvur ako aro them oma paatealing a ler God ile umongare a opowe tel.” 4 Na tho nongpol areko o ela a God ile paatealing a opowe kene oa titaling na i pavurvur nge 144,000. 12,000 nge Judare ole net omole omole. 5 Ranga ve Juda, na Ruben, na Gat, na Aser, na Naptali, na Manase, na Simeon, na Livai, na Isakar, na Sebulun, na Josep ome a Benjamin. Toko or 12,000 nge net omole omole areken o el a God ile paatealing aken.

Pulua pomnga o lotual a God.

9 Lama tho thopol pulua pomnga na i pavurvur aro toko e i tital or avele, na or ini toko na seng areko o voth a pen elonga ake ru a ulue ako okei rel rel, na oni peti rel rel, na ole net rel rel, na o mit a mukaling nge nepes a menonga aken a Sipsip Tun itheki lemi, na o teun tekruk seltunnga velelesnga, na o krim vait thoing a omeni. 10 Na o presa viringa na o vo voing ako i vene,

“Ler God ako i men a nepes a menonga
tomo nge Sipsip Tun
or paini inga ako o pamimi it.”
11 Na ensel alavusnga o mit kalalual nepes a menonga aken tomo nge mukalinga areken na ur miminga or penel aken. Na o koru oeve nge nepes a menonga aken ma o lotual a God. 12 Na o vo voing ako i vene,

“I nunganga!
Te risea ler God
na te papomnga i,
na te ri sivengaing a i nge,
na te paaolonga i,
eneke iion i kima,
na ile mire aolonga,
na ile engenging aolonga.
Naro te oma venen aken
nge nang elonga
ako aro ile vusonga avele.
I nunganga!”
13 Lama toko mukalinga aken e i nina tho ve, “Na areko o teun tekruk seltunnga velelesnga, or ini anga? Na o es a kath me?”

14 Na tho olal ile riong ve, “Toko Pomnga, lemik mire nge avele.”

Na i ria tho ve, “Or ini areko o espot me nge matheong aolonga na sisisong. Na Jisas ile rinong i pariri or a God itheki, na i ranga ve ako o paut rir ole teunong nge Sipsip Tun ia mla, mako oa teunong i veleles. 15 Maken

“O mit a mukaling nge a God ile nepes a menonga
na nang na mlik o oma ile omaing
a ile Lotu Tepun a Vel lemi.
Na toko ako i men nge nepes a menonga aken
i voth tomo nge or na i theal or.
16 Naro mesi pun ol or avele,
naro thei i pun mun or avele ol,
naro nang eve pen velnga
i pavurvur aro i in oni peti avele ol.
17 Eneke Sipsip Tun
ako i voth tothal nge nepes a menonga aken,
aro i velpol ini othealnga,
naro i wol or a pen
ako thei ako i sung mimiong
kene i lelpot nge me.
Na God aro i girtetpot otheki einga
naro o tang ol avele ol.”